作為年青一代，雖然未親身經歷過，但自覺有責任背起這歷史包袱，未敢忘記前輩追求民主的理想。
但理想還理想，事實還事實，就算終有一日某領導人出來揹鑊，肯講番句人講的說話，始作俑者一早死的死，隱的隱，果班蛋散先至係要血債血償的人。其實中共一早認左佢咪好，等事件告一段落，無謂河蟹完一代又一代，到N年後原本唔關你事的反而做埋幫兇。
而家中共的洗腦政策，舊仇未報又添新怨，總之隻字不提，證明佢地係點都唔會認呢筆賬。
民主要追求，街要上，威要示，但你要佢哽呢單野，我覺得冇可能。就算有生之年見到中共倒台，都唔會有人企出來，有都唔會係主謀，劏左佢都無補於事。中國人太要面子了，何況係國恥。
六四發生時我幾歲都未有，真係唔關我事的。不過既然中共廿年來都解決唔到件事仲搞埋哂D陰毒手段迫害人，唔知的都變知，你叫我點忘記？你如果一早搞掂件事我可能都係幾歲仔，點會搞成咁年年有人提起？果幾年後世界其他地方打仗死的人可能仲多，我都唔係好記得，偏偏我記得六四，偏偏又唔係D咩光彩野，仲衰過當年外敵侵華，打自己人就叻，我呸。
